Зал көзге урман табигатенә туры китереп бизәлгән, әкрен генә моңлы көй яңгырый. Тәрбияче балаларны залга алып керә.
Тәрбияче: - карагыз әле, балалар, нинди матурлык! Без сезнең белән бүген көзге урманда.
Ни арада җәй үтте,
Алтын көз килеп җитте.
Шатлык тулы бу бәйрәмне,
Балалар күптән көтте.
Тәрбияче: - нидер кыштырдый түгелме? (балалар як-якка карана).
Кемдер килә ахрысы (балалар урындыкларга китә).
Куян: (куркып кына) - хәерле көн, мин куян булам. Кечкенә генә, бик йомшак кына, бик куркак кына.
Тәрбияче: - бер дә курыкма куянкай, кил бире, без сиңа тимибез, шулай бит, балалар (әйе). Әйдә безнең белән уйнарга.
"Ак куянкай" җырына хәрәкәтле уен.
Куян: - рәхмәт Сезгә балалар, бик матур уен булды. Әйе, усаллардан куркабыз, качабыз без, тик менә кышкы суыклар җиткәнче, минем үз йортым булсын иде...
Тәрбияче: - балалар, әйдәгез куянкайга матур йорт төзеп бирик.
Балалар: - әйдәгез.
Уен "Мин төзүче". Балалар зур кубиклардан ике командага бүленеп йорт стенасын урнаштыралар.
Куян:-нинди матур Теремкәй килеп чыкты, рәхмәт балалар (куян сикереп кереп китә, башын гына чыгарып карап тора)
Тәрбияче: - менә Теремкәйгә беренче кунак та килә түгелме?
Музыка астында бака керә.
Бака: - Терем, терем, теремкәй, теремкәйдә кем яши?
Куян: - мин куркак куян, озын колак, ә син кем?
Бака: - мин бака-бакылдык, көннәр суытты, көз җитте, керт мине зинһар өеңә?
Куян: - ә син бака берәр һөнәр беләсеңме? Белсәң, кертермен.
Бака: - мин бик тәмле итеп ашарга әзерлим. Менә хәзер балалар белән сиңа яшелчә ашы һәм компот әзерлибез.
Уен "Яшелчә һәм җиләк-җимешләрне таны". Ике командага бүленәләр, бер команда яшелчәләр җыя, икенчесе җиләк-җимешләрне аерыа китерә.
Куян: - м-м-м, бик тәмлегә ошаган,рәхим ит бака, бергә күңелле булыр.
Тәрбияче: - шулай итеп куян белән бака бергәләп яши башлый.
Музыка астында төлке керә.
Төлке: - Терем, терем, теремкәй, теремкәйдә кем яши?
Куян: - бу матур җылы йортны миңа балалар төзеп бирде. Бака белән икәү яшибез. Син кем?
Төлке: - мин төлке. Хәйләкәр диләр мине.Минем дә бу җылы матур йортта сезнең белән яшисем килә.
Куян: - ә нинди кызыклы һөнәрең бар?
Төлке: - мин бик матур шигырьләр беләм, хәзер балалар белән сөйләп китәбез.
Төлке балалар белән шигырь сөйли һәм әкрен генә өйгә кереп китә.
Көчле музыка ишетелә, ерактан аю күренә.
Аю: - бик матур йорт күреп килдем.
Терем, терем, теремкәй,
Зур түгелсең, кечкенә,
Кертче мине үзеңә.
Бик нык йокым килә.
Куян: - нинди яхшы һөнәрең бар синең аю дустым?
Аю: - бәлки йортны саклармын(үзе исни, йокысы килә)
Бака: - кертик куянкай, безгә сакчы да кирәк.
Тәрбияче: - менә шулай итеп безнең җәнлекләр бергәләшеп матур гына яши башлыйлар. Куян кишер кимерә, бака пешерә, төлке шигырьләр укый, ә аю йоклый-йоклый Теремкәйне саклый.
Әйдәгез әле балалар, бер күңелле җыр җырлап алыйк.
Җыр: Яфраклар.
Шулчак кемдер ишек шакый. Карасалар көз кызы Сөмбелә икән.
Сөмбелә:
- мин Сөмбелә, көз кызы,
Муллык, байлык өләшүче.
Тырышканны хөрмәтлим,
Ялкаулардан читләшәм.
Күрәм, монда бик тырыш балалар җыелган, җәнлекләремә матур Теремкәй төзеп биргәнсез. Бу изге эшегез өчен тәмле алмалар белән сыйлармын. Ә хәзер уйнарга чакырам.
Уен "Кояш һәм яңгыр"
Тәрбияче: - Сөмбелә, күчтәнәчләр һәм уеның өчен зур рәхмәт сиңа, бездән дә күчтәнәч кабул ит.
Күңелле бию "Алтын камка"
Сөмбелә: - бу матур бию өчен зур рәхмәт сезгә. Гел шундый тырыш, акыллы, сәләтле булып калыгыз. Менә сезгә бер кәрҗин алмалар. Ә миңа китәргә вакыт, сау булыгыз!
Балалар: - сау бул, Сөмбелә! Рәхмәт!
Тәрбияче: - әйдәгез балалар җәнлекләр белән хушлашып, без дә кайтыр юлга чыгыйк.
Балалар: - язга кадәр, уңышлы кыш көннәре Сезгә.
Җәнлекләр: - рәхмәт сезгә, балалар!